Ze Žitawy. W literarnej hodźince přichodnu njedźelu (26. 3. 2023) w swobodnym internetowym Radiju Zett (www.radio-zett.org ) předstajitaj so basnik a kulturnik Jurij Łušćanski a Marhata Cyžec-Korjeńkowa, dirigentka a komponistka njeličomnych pěsnjow a popowych songow. Tworićelej na polomaj serbskeje poezije a spěwneje hudźby přednjesetaj basnje a přeradźitej w rozmołwje něštožkuli wo nastaću někotrych hudźbnych hitow. Teksty Jurja Łušćanskeho, Marje Krawcec a Jana Skale recituje zdobom w čěskim přełožku basnik Milan Hrabal z Varnsdorfa.
Z dalšej a z tym pjatej hodźinku literatury a hudźby so zdobom 2. štafla lětušeje „Serbskeje čitanskeje jězby” w swobodnym radiju ze Žitawy zakónči.
Radijo Zett natoči a wusyłaše w minjenymaj lětomaj 11 serbskich literarnych hodźinkow, w kotrychž sydomnaće serbskich awtorow a spěwotwórcow swoje dźěła w serbskej a dalšich rěčach předstaji.
Wšitke hudźbne wobrubjenja čitanjow wupytachu tohorunja hłowni akterojo wusyłanjow.
PM / B. Dyrlich