Serbski informator so bórze hasnje
Z Choćebuza. Njewotwisny serbski medij Serbski informator, kotryž je wot lěća 2021 online (serbski-informator.org) skutkował, so bórze likwidacije Swobodneho społka dla hasnje. Serbski informator skutkowaše jako medijowe wokno Swobodneho społka a měješe wšelke perspektiwy k problemam w serbskim towaršnostnym žiwjenju předstajeć. W času skutkowanja wozjewichu so mnohe přinoški ke kulturnym, politiskim, stawizniskim a socialnym temam, kotrež potrjechja serbske žiwjenje.
“Zajim na Serbskim informatoru eksistowaše, štož pokazachu čitarske listy a komentary k tekstam, ale běše njedosahacy. Abonowanski system přinoškow njeje so přesadźić móhł, tak zo bě Serbski informator hač do dźensnišeho wot čłonskich přinoškow Swobodneho społka wotwisny. Byrnjež Swobodny społk honorarne přinoški (budget) za swobodnych awtorow a awtorkow Serbskeho informatora zmóžnił, njemóžachu so wočiwidnje honorarne sadźby z tymi pola statnje mj. dr. ze Załožby za serbski lud spěchowanych medijow přirunować. Tež powšitkownje falowachu nowi awtorojo a nowe awtorki, kotřiž bychu wo serbskich temach přinošowali. Nowostka Serbskeho informatora w serbskim medialnym njebju běše, zo započachu so nimo hornjo- a delnjoserbskich a němskich tež jendźelskorěčne přinoški wozjewjeć. Facit z toho třilětneho nazhonjenja je, zo njewobsteji tuchwilu dosahacy zajim ani na přinošowanju ani na přijimowanju (njestatnje spěchowanych) wobsahow,” rjekny wotchadźacy šefredaktor Viktor Zakar. Redakcija Serbskeho informatora wobsteješe w zańdźenosći z třoch skutkowacych. Nimo něhdyšeho šefredaktora, skutkowaštej pola Serbskeho informatora redaktorka Hańžki Wjeselic a layoterki Sofije Cyžec. Techniska a wobsahowa struktura so archiwuje, tak zo hodźi so Serbski informator w přichodźe zaso startować.
Serbski informator so dźakuje wšěm swojim přinošowarjam a přinošowarkam a podpěraćelam za dobre zhromadne dźěło. Serbski informator přeje strowe nowe 2024 lěto a wjele wuspěcha a krutu strowotu.
nowinska zdźělenka