Dnja 08. februara 2022 zahaji oficialnje nowy inowatiwny europski integraciski projekt LUSATIA GLOW (LG). Zjawne předstajenje projekta wotmě so w nowinarskim klubje Brüssel Europa. Jedna so wo iniciatiwu čěsko-słowakskeho hibanja, mjenujcy SLAVONIC EUROPE (SE), kotrež wuchadźa z Brüssela. Partnerojo tutoho projekta SE su SERBSKI SEJM, Łužica / DE, ŁUŻYCKI ALIANS, Wrocław / PL a LUŽICKÁ ALIANCE ČR, Jindřichovice pod Smrkem / CZ.
Zakład projekta bazuje na ideji europskeje integracije: jednotliwe hranicu překročace etniske skupiny słuža jako integraciske sukowe dypki. To woznamjenja cyłostnu změnu paragidmy integraciskeje politiki EU a ma wosebje koheziju, t.r. nutřkownu zwjazanosć, Srjedźneje a Wuchodneje Europy spěchować. Konkretnje ma so syć mjeńšinow po Europje wutwarić a tak měr po Europje skrućić.
Po nowinskej konferency přizamkny so třihodźinski workshop z wobdźělenjom ciwilnotowaršnostnych syćowych partnerjow z pjeć hranicy překročacych regionow iniciatorow (Łužica – D/CZ/PL, Atlantik – E/P, Alpe-Adria – A/Slo/I, Beskidy – CZ/ PL/ SK, Eifel – B/D/L/NL). Něhdźe 30 přitomnych a 130 onlinowych zajimcow so wobdźěli na zarjadowanju.
LUSATIA GLOW – iniciatiwa (LG) ma hižo podpěru předsydki kulturneho a kubłanskeho wuběrka Europskeho parlamenta knjeni Sabine Verheyen, z kotrejž běža rozmołwy hižo wot julija 2021 sem. „Kultura je to, po čimž so rozeznawamy, ale z njej tež jedyn cyłk bywamy. Mamy bohate kulturne namrěwstwo w Europje, kotrež mamy sej česćić“, rjekny Sabine Verheyen. W běrowje knjeni Verheyen w Europskim parlamenće wotmě so hodźinske zetkanje ze zastupjerjemi Serbskeho sejma a Brüsselskej Slavonic Europe-załožbu. W ramiku zetkanja wupraji knjeni Verheyen hišće raz wuraznje swoju podpěru za iniciatiwu a potencielne móžnosće realizowanja projekta so wobrěčachu.
Hižo we wulkim róžku 2022 je so direktna wuměna z komisarku za kubłanje, slědźenje, kulturu a młodźinu, knjeni Mariju Gabrielowej a jeje posłužbowej generalnej direkciju EAC (kubłanje a kultura) k LUSATIA GLOW-iniciatiwje wotměła, kotruž posudźuje komisija jako wuznamnu.
Po porěčenju z knjeni Verheyen je delegacija hišće składnosć dóstała, LUSATIA GLOW-iniciatiwu předsydźe CDU Friedrichej Merzej předstajić, kotryž bě na nadrobnosćach zajimowany a z kotrymž wujednachu dalšu wuměnu.
Nowinska konferenca w Brüsselu, wopyt pola Sabine Verheyen (MdEP) a rozmołwa z Karl-Heinzom Lambertzom buchu wot kameroweho teama přewodźeni a wupłód filmowanja so w bliskim času publikuje.
Wjace informacijow k Slavonic Europe a projektej Lusatia Glow namakaće pod: https://www.slavonic-europe.org/the-movement/
pm/Hańžka Wjeselic
Foto: Nowinske foto/O. Donnet.