Drugi źěl serbsko-łužyskich wopśimjeśow lětosnego Chóśebuskego filmowego festiwala bu nowym filmam młodych filmarjow a filmowaŕkow a alternatiwnej muzice pósćony. Źo wó styri nejnowše ze serbskeju abo łužyskeju tematiku: Weisswasser Rundfahrt 01, Čert – John, Paul, George, Ringo & Richard feat. Jimmie Page, Jajo a Gólska Roža ako teke muzikowy klip Kolektiwa klanki: Mróčele. Pśez tśi ze styri wopśimjeśow wótmóluju se tematiki musko-žeńskecych póśěgow, teke casy žeńskosć a feminizm graju rolu.
Weisswasser Rundfahrt jo film z lěta 2020, wó pśichoźe brunicowego rewěra. Pśez carnoběłosć jo dojśpił režiser lěpšu napśeśiwnosć mjazy pśedmjatami, mjazy pśirodu a industrijnych kompleksow. Wósebnosć filma jo perspektiwa woglědanja swěta ze zemje do směra njebja.
Film Čert Kolektiwa wakuuma z Města jo wósebnje wušpicnjona satira muskich „inženjerow“ – nicowarjow serbskego imaginarnego swěta, kótarež bywaju wót pśezpołdnice a drugich serbskich figurow gónjone. Wócywidnje industrija pśedstajona wót mužyskow stoj na droze serbskego swěta, kótaryž se pśez mócy pśezpołdnice, wódnego muža a drugich powěsćowych bytosćow zašćitujo.
Jajo jo z wósebnje bogateju symboliku nabyty film młodych filmarjow, něgajšnych wuknikow a wuknicow Dolnoserbskego gymnaziuma. Film bazěrujo na zapśimjeśe cyklusa jako faza zachopjeńka a kóńca (žywjenja), w kótaremž grajotej serbska mytologija a kśesćijańska slězyna wjeliku rolu pśez nejwažnjejšy symbol we filmje: jajo. Film na drugi part pśedstaja feministiski póglěd na nastaśe žywjenja w duchu kśěsćijaństwa. Pisanosć filma, w kótaremž pokazuju a graśe ze barwami dajotej dalšne asociacije wubuźiś. Tak rolu graju wšake rostliny abo bomy (ako jerjebina abo głog?).
V. Zakar